Bakı Dövlət Universiteti Beynəlxalq münasibətlər və İqtisadiyyat fakültəsi

Bakı Dövlət Universitetinin (BDU) Beynəlxalq münasibətlər və iqtisadiyyat fakültəsində Qazaxıstanın nüfuzlu ali təhsil müəssisələrindən biri olan Əl-Fərabi Qazax Milli Universitetinin Beynəlxalq münasibətlər fakültəsinin nümayəndə heyəti ilə görüş keçirilib.

 

Görüşdə BDU-nun Beynəlxalq əlaqələr şöbəsinin müdiri Rauf Həsənov, fakültə dekanı Laçın Abışlı, Dünya iqtisadiyyatı kafedrasının müdiri Fərid Babayev, eləcə də Əl-Fərabi Qazax Milli Universitetinin Beynəlxalq münasibətlər fakültəsindən Nuriddin Sultanmuratov və digər nümayəndələr iştirak ediblər.

Görüş zamanı iki universitet arasında beynəlxalq əməkdaşlığın genişləndirilməsi istiqamətində müzakirələr aparılıb. Tərəflər mübadilə proqramlarının tətbiqi, tələbə və müəllim mobilliyi, elmi-tədqiqat sahəsində əməkdaşlıq imkanları haqqında fikir mübadiləsi aparıblar. Eyni zamanda, beynəlxalq münasibətlər və diplomatiya, beynəlxalq iqtisadi münasibətlər kimi sahələrdə magistratura dərəcəsində ikili diplom proqramlarının yaradılması perspektivləri də nəzərdən keçirilib.

 

Həmçinin iki universitet arasında birgə layihələr və akademik əməkdaşlıq çərçivəsində elmi konfransların, seminarların təşkili, eləcə də ortaq tədqiqat proqramlarının həyata keçirilməsi barədə razılıqlar əldə olunub. Görüş BDU və Əl-Fərabi Qazax Milli Universiteti arasında mövcud əlaqələrin daha da inkişaf etdirilməsi üçün əhəmiyyətli addım kimi qiymətləndirilib.