Bakı Dövlət Universiteti Beynəlxalq münasibətlər və İqtisadiyyat fakültəsi

Bakı Dövlət Universitetinin Beynəlxalq münasibətlər və iqtisadiyyat fakültəsinin əməkdaşları Xankəndidə təşkil olunmuş “Qarabağ V Beynəlxalq Elmi Tədqiqat Konfransı”nda elmi məruzələrlə çıxış ediblər.

Diplomatiya və müasir inteqrasiya prosesləri kafedrasının əməkdaşları s.e.f.d. Gülgün Quliyeva və s.e.f.d. Xatirə Mehdiyeva konfrans çərçivəsində “Qərbi Azərbaycan məsələsinin Cənubi Qafqazda təsirləri” və “Qərbi Azərbaycan məsələsinin gündəmə gətirilməsində diaspora diplomatiyasının rolu” mövzularında təqdimatla çıxış ediblər. Məruzələrdə Qərbi Azərbaycan kontekstində regional təhlükəsizlik, beynəlxalq hüquq və diasporanın milli maraqların müdafiəsində artan əhəmiyyəti elmi əsaslarla təhlil olunub.

Konfrans çərçivəsində postmünaqişə dövründə regional siyasətin transformasiyası, beynəlxalq diplomatik münasibətlərin inkişaf dinamikası və diasporanın transmilli çağırışlar qarşısında oynadığı rol ətrafında dərin müzakirələr aparılıb. Qlobal və regional aktorların fəaliyyəti fonunda Azərbaycanın xarici siyasət strategiyasının yeni istiqamətləri və diplomatik alətlərinin təkmilləşdirilməsi məsələləri də tədbirin diqqət mərkəzində olub.

Tədbirdə iştirak edən yerli və xarici tədqiqatçılar, diplomatlar və ictimai xadimlər Qarabağ və ətraf bölgələrdə davamlı sülh və əməkdaşlıq mühitinin yaradılması üçün akademik yanaşmaların əhəmiyyətini vurğulayıblar. Konfrans, həmçinin, gənc alimlər üçün tədqiqat təcrübəsi mübadiləsi baxımından da əhəmiyyətli platforma rolunu oynayıb.